مسلم: بيكا وشاكوش وعمر كمال مطوروش من نفسهم.. واللي نجح ويجز وعفروتو

كشف مطرب المهرجانات مسلم، عن عدد من الأمور والمواقف المسيئة التي تعرض له في بداية حياته، وذلك من خلال استضافته ببرنامج “أسرار” مع الإعلامية أميرة بدر المذاع على قناة النهار.

وتحدث مسلم عن موقف سيئ جمعه بالمنتج أحمد السبكي قائلاً: “كنت صغير ونزلت القاهرة رحت للسبكي، دخلت سلمت ورفض السلام عليا، وبصلي من فوق لتحت وقالي يالا يابني على إسكندرية مبنساعدش حد هنا، ومشيت من الدقي لصلاح سالم بعيط ومنهار، لكن بشكره دلوقتي لأنه اداني طاقة وغل للشغل”.

مسلم: عندي أغنية في فيلم شقو.. وهدخل مجال التمثيل بفيلم مع ماجد الكدواني 

وتابع مسلم حديثه قائلاً: “وصلت للي بحلم بيه بس عمري ما أنسى الموقف ده، وطلب اشتغل معاه في حاجة ورفضت، وابنه كريم صاحبي وعندي أغنية في فيلم شقو، وفيه دور جايلي وفيه نجوم كبيرة زي ماجد الكدواني وعمرو عبد الجليل”.

مسلم: بيكا وشاكوش وعمر كمال مطوروش من نفسهم

وتطرق مسلم للحديث عن حقيقة خلافه مع بيكا وشاكوش وعمر كمال، كما كشف عن رأيه فيهم قائلاً: “عمري ما اتخانقت مع بيكا وشاكوش وعمر كمال، وكانوا ناجحين مع بعض لكن دلوقتي خلاص عشان مطوروش من نفسهم، كانوا بيعملوا الموسيقى واحدة وبيغيرو الصوت بس مفيش جديد، مفيش سكة جديدة.

وأتم حديثه قائلاً:”اللي نجح ويجز وعفرتو انهم عملوا سكة جديدة، وطوروا ولما كنت في حفلاتهم لقيت ناس سنها كبير في الحفلة”.

كما علق مطرب المهرجانات مسلم على حبه للملابس المثيرة للجدل قائلاً: “كان نفسي في حاجات قبل ما اتشهر، وبقيت مدمن لبس و24 ساعة في زارا، وروحي فيه، وفي حاجات بجيبها من بره، وزارا بجيب منه لبس اجمد من جوتشي وديور، وانا بعشق اللبس، وبشتري ب 200 ألف في الشهر لبس”.

وتابع: “يوم الخطوبة لبست شيفون عشان مختلف وبحب الحاجة الغريبة، وطلعت في حفل العلمين بكروب توب، وبحب الحاجات المجنونة دي والهجوم نجاح، والعرق الصعيدي ده للحاجات التانية، وبحب الموضة لكن عمري ما البس حلق ولا ادق وشم، ولبسي الغريب متطلبات شغلي لكن مش بمشي بيه في الشارع”.

مواعيد عرض برنامج أسرار في رمضان 2024

يشار إلى أن تقدم الإعلامية أميرة بدر برنامج “أسرار” على شاشة النهار يومياً خلال شهر رمضان 2024، في تمام الساعة التاسعة والنصف مساءً، وتستضيف من خلاله عدد من نجوم الفن والرياضة والسياسة في مصر.