لافينا نادر لـ “الموطن”: ترشيحي لمسلسل “صوت وصورة” عن طريق النجمة حنان مطاوع..وأمينة خليل انبهرت بأول مشهد ليا في فيلم “شماريخ”

كشفت الطفلة لافينانادر كواليس مسلسل “صوت وصورة”، والتي تم عرضها مؤخراً عبر شاشة قناة dmc ومنصة Watch it، وتحدثت لافينا نادر عن دعم النجوم لها أثناء فترة التصوير وعن أصعب المشاهد لها في العمل من خلال تصريح حصري لموقع “الموطن“.

حيث قالت لافينا نادر أن ترشيحها للمسلسل جاء عن طريق النجمة حنان مطاوع موضحة:«أستاذة حنان مطاوع هى اللى رشحتني للدور علشان أنا كنت بمثل معاها فى مسلسل سره الباتع شخصيتها وهى صغيرة فحبتني ورشحتني للمسلسل والمخرج محمود عبد التواب ( توبة ) مخرج مسلسل صوت وصورة قال لى إنه اتفرج على كل اعمالى واني ممثلة شاطرة جداًعلشان كده وافق على الترشيح .. والحمد لله مفيش أى صعوبات حصلت لى فى المسلسل بالعكس كلهم بيحبوني اوى وبيعملوا لى كل اللى أنا عايزاه وبجد أنا عايزة أشكرهم كلهم على حبهم ليا ومساعدتهم ليا وفرحتهم بنجاحي».

وتابعت لافينا نادر تصريحاتها بالكشف عن تعامل النجوم معاها في لوكيشن تصوير مسلسل “صوت وصورة” قائلة: «كلهم كانوا بيحبوني أوى لأننا اتعرفنا على بعض فى بروفة ترابيزة قبل التصوير لكن طبعا النجمة الرائعة حنان مطاوع كانت أقرب واحدة ليا وفعلا كانت أم حقيقة ليا فى الكواليس وكانت تسألني لو محتاجة حاجة ولا لاء وبتخاف عليا أوى وبتحبني فعلا زى بنتها وأنا بحبها زى مامي بالضبط».

لافينا نادر تكشف أصعب مشاهدها في مسلسل “صوت وصورة”

وكشفت الطفلة لافينا نادر عن تأثير المشاهد عليها في مسلسل “صوت وصورة” قائلة: «بصراحة المشاهد اللى كان فيها عياط كنت بحس أني مصدعة جامد بعد ما بصورها وبحس أني مرهقة أوى وكتير بكلم نفسي وأنا فى الطريق للتصوير علشان أكون بجهز نفسي للشخصية».

وأوضحت لافينا نادر أصعب مشهد لها في مسلسل “صوت وصورة” قائلة: «المشهد اللى بصور فيه فيديو علشان أرد على الفيديو اللى هى بعتهولي».

لافينا نادر تعرب عن سعادتها بردود الأفعال على شخصيتها في مسلسل “صوت وصورة”

وأعربت الطفلة لافينا نادر عن سعادتها بردود الأفعال على دورها في مسلسل “صوت وصورة” قائلة: «مبسوطة اوى طبعا من ردود الأفعال.. بصراحة كنت حاسة أني عملت الدور حلو لأن بعد كل مشهد كان كل كرو العمل يقولى برافو وفرحانين بيا بس بصراحة النجاح أكبر من التوقع .. هو مش تعليق هو بوست نزله الصحفي أشرف شرف على صفحته ع الفيس ونزل صورتي وكتب أن النجمة العظيمة ميرفت أمين اتصلت به وسألته عني واللى يعرفني يبلغني أنها معجبة بيا جدااا وأني مش بمثل تمثيل طفلة لاء دى ممثلة ثقيلة ولازم ندعم الموهبة دى».

لافينا نادر تتحدث عن دورها في فيلم “شماريخ” وتكشف أسماء النجوم التي تتمنى التعاون معاهم

وتحدثت الطفلة لافينا نادر عن دورها في فيلم “شماريخ” قائلة: «دوري فى فيلم شماريخ فعلا هتبقى أكبر مفاجآة لكل الناس لأنه مختلف تماما عن كل الأدوار اللى مثلتها قبل كده وفعلا أنا بعتبر أستاذ عمرو سلامة أكتشفنى من أول وجديد .. آسر ياسين حبيني جدا وقال إن أنا شاطره وذكية جدا وأستاذة أمينة خليل انبهرت بيا من أول مشهد بدأنا نصوره مع بعض وقعدنا نتكلم كتير اوى بعد المشهد».

وأتمت الطفلة لافينا نادر تصريحاتها بالحديث عن النجوم التي تتمنى التعاون معاهم وعن أقرب الأدوار لها قائلة:«أتمنى التعامل مع كريم عبد العزيز وأحمد عز وأحمد السقا وأحمد حلمي وتامر حسني ومنى زكي ودينا الشربيني .. أقرب 3 أدوار لقلبي فيلم شماريخ لأنه مختلف، ومسلسل صوت وصورة لأنه بداية نجومية حقيقية، وفيلم شلبي لأنه من أصعب الأدوار اللى مثلتها».